اغنيتنا الفلسطينية

يا اغنيتنا الفلسطينية
اختزلنا فيك التراث والهوية
وحلم العودة
وحل القضية
وفيك معاناة شعبي
وتحدي الزمن
مهما طال حل القضية

هالاغنبة الشعبية
فيها كل المعاني الوطنية والثورية
هي مش للطرب
ولنضيع من الوقت شوية

لسه وقت الطرب ما حان
والتضحية
مطلوبة بايامنا الجاية

واغنيتنا الفلسطينية
بكل جذورها الوطنية
لترسخ فينا الهوية
وما ننسى
الطابون وبير المية
ولبس العقال والكوفية
وحتى ما ننسى انه
كل شبر بفلسطين
مجبول بدم وعرق اصحابها
مش مجبول بس بالمية

والاغنية الوطنية
مكتوبة لنظل في قلوبنا
نحمل الحنية
لبلا دنا المسلوبة
حتى تنحل القضية
وما ننسى واقع الحال والاحتلال
واهلنا المهجرين
في العالم وبلادنا العربية

وهالاغنية الثورية
هي اللي بتخلي ذاكرتنا قوية
ونتحضر للفدى والفدائية
لسه وطنا تحت الاحتلال
وعدونا
بدوا ضربة قوية

ويا شعبي
الاغنية ما بتحل القضية
ان ما ترجمنا اقوالها
افعال حقيقية

والاغنية ما بتحل القضية
لو غنينا الف موال
وفوقهم سحجة ودحية
والهدف منها
زرع النخوة فينا والحمية
وبتحمسنا على القتال
لنحرر فلسطين الابية

ومعاني هالغنية
بتفرض علينا يومية
نزال ضد العدو وعملية
حتى للوطن ترجع
الجنسية العربية
ونخلص فلسطين من براثن
الاحتلال والهمجية

وبعدها نريح هالبال شوبة
ويحين وقت الغنى والطرب
ونغني باعلى الصوت للتحرير
احلى غنية
نغني العتابا والدلعونا
وزريف الطول والروزنا
ومعها ندبك شوية
بفرحة التحرير والعودة
وحل القضية
اللي من ثلاث وستين سنة
لسة على الحل مستعصية
******************************مازن الطريفي 15/2/2011 م

يعطيك العافيه اخ مازن
مميزة ومبدع كلمات اكثر من رائعه ماننحرم
لك منى كل تقدير واحترام

نغني العتابا والدلعونا
وزريف الطول والروزنا
ومعها ندبك شوية
بفرحة التحرير والعودة
وحل القضية
اللي من ثلاث وستين سنة
لسة على الحل مستعصية


والله اعلم يا ابو محمد
متى رح تظل كمان


ابدعت ابو محمد

مواضيع منفرده وكلمات ولا اجمل


بوركت الايادي

هو في بعد الدلعونا ..والعتابا والميجنا ...

الله الله ...الحمدلله انه لسه تراثنا بخير

الف شكر على تنوع المواضيع في جعبتك اخي الكريم


نورت همس القوافي