جمالك مع نانيس.. الماسكرا لرموش جذابة

النهارده هنتكلم عن حاجتين اتنين ممكن إنهم يدوا شكل جذاب
للرموش وهما؛ الماسكرا والرموش الصناعية، وهابدأ كلامي بالكلام عن
الماسكرا..

طبعا مافيش بنت ممكن إنها تستغنى عن الماسكرا لأن الماسكرا بتدي للرموش
كثافة، وبتخليكِ تحسي إن رموشك طويلة، وبتظهر أهمية الماسكرا عند البنات
اللي بتعاني من إن رموشها خفيفة أو قصيرة، دي فوايد الماسكرا.

وللماسكرا أنواع متخلفة، وكل نوع من الأنواع له تأثير مختلف على الرموش فمثلا يوجد..

• النوع اللي بيستخدم لرفع الرموش وتطويلها.
• النوع اللي بيستخدم في تكثيف الرموش وتفريقها عن بعض.

والاختيار في النهاية بيرجع ليكي على حسب شكل رموشك، والنتيجة اللي إنتي عايزاها

إزاي تستعمليها؟!
طريقة استعمال الماسكرا سهلة جداً ولكن لازم تستخدميها بشكل عمودي؛
عشان تفرقي بيها الرموش عن بعضها، وبتبدأي من الجذور لفوق، وكمان بتبدأي
من الزاوية الداخلية للعين ثم المنتصف ثم آخر العين، ودي هي الطريقة
السليمة لتكثيف الرموش وإطالتها.

وخدي بالك من شوية الحاجات دي وإنت بتستعملي الماسكرا:

• إن لو كانت عينيك ضيقة يبقى حطي الماسكرا على الرموش السفلية؛ وده علشان تدي شكل أوسع لعينيكي.

• إن لو عينيكي واسعة يبقى اكتفي بإنك تحطي الماسكرا على الرموش العلوية فقط.

•
لو حسيتي إنك محتاجة تدي لرموشك طبقة تانية لازم تستني شوية لغاية ما
الطبقة الأولى تنشف وبعد كده تحطي الطبقة التانية من الماسكرا؛ عشان تدي
تُقل وكثافة أكثر، وتركزي على المنطقة الداخلية والخارجية للرموش.

• لو لقيتي رموشك مع الماسكرا التصقت ببعضها حاولي تفرقيهم عن بعض بفرشاة أسنان قديمة أو فرشاة ماسكرا تكوني مش بتستعمليها.

الرموش الصناعية.. للمناسبات
أما بقى لو عندك سهرة أو مناسبة أو لو كنتي عروسة فأنصحك إنك تركبي رموش صناعية وفيه شكلين للرموش الصناعية..
الشكل الأول
اللي بيتركب واحدة واحدة باستعمال الملقاط.

الشكل التاني
وده بيكون قطعة واحدة وبيكون شكلها طبيعي بس لازم حد متخصص هو اللي يركبها لك.