متل ما قالو احنا بنقول يعني الشب هو ابونا واخونا وصاحبنا وجوزنا وحبيبناو تبع الدكانة وحتى احمد ورائد وسعيد وجاسم ومدحت وفهمي وطوني وجورج ومايكل وجيمس وفرانسوا كل هظول شباب وحتى ماري ولا لأ ماري بنت وهريدي ومهاوش وذياب عادي طبيعي كلهم شباب بس انا بما اني لفيت ورحت واجيت وشفت شباب باكتر من مكان وباكتر من بلد حبيت احكي عن اكثر عشرطاشر شغلة بكرها بالشباب واكيد بشكل عام عشان ما حدا يؤكلني ويفكرني بخصص شباب بلد معين المهم ... اه من الشباب وما ادراك مالشباب من الي شفتو يا اخواتي البنات الحلوين( بدي اكون متحيزة للبنات هالمرة ) انو الشب وما مهما اختلف مكانو وزمانو ونوعو(زواحف الجماعة) هدفو الاول بالحياة طبعا اول ما يصير مراهق اخونا...........
((بدي اظبط بنات)) كلهم بنامو وبحلمو وبدنا نتعرف على بنات وبياكلو ويشربوو برضو بدنا نظبط بنات يا سلام ايش الهدف السامي بالحياة يعني بدهم يحلو القضية وانو ما بتلاقيهم الا مرميين بها الشوارع (ودايرين على مراقع فقس).. وبدورو على بنات طقع على قولتهم او بنات شقف يعني وصف بخليكي تحسي حالك قاعدة على سيخ ونايمة على منقل او بنت صاروخ شو الاخ كاين يحلم يصير رائد فضاء وهو صغير او على وحدة بتخنق او بتشلق او بتفلج (او اي مرض او اي مصيبة) و لا اشي عنجد عجيبة مسميات الشباب للبنات او ممكن شباب يسموها مزة طب ودا من ايه ايش فيه مزة مين والناس نايمين طب بدكم تعلقو بدكم تظبطو سمو اسامي مثل الخلق بنت حلوة بنت قمر.. شقفة ليش شايفيينا طالعين من ملحمة .. بنيجي على الجزء الي بكون قبل التزبيط الا وهو برظو التزبيط ايش العالم هدول كل حياتهم تزبيط بتزبط بس هون يختلف التزبيط هون الاخ بزبط حالو عشان يروح يزبط بنات وهدول الشباب بهاظ الجزء بالذات ينقسمو الى4 اقسام بس اقسام شو اشي من الاخر:
1: فايع مخنوق
فايع مخنوق: وبالاغلب بكون الشب هاظ خز او خز نشيط او طربش يعني الشب هون بيلبس الي على الحبل من ملابس ابوه او اخوه الكبير المتجوز الي كان مراهق سنة الف وتسعمية وخشبة او احدث من هيك ايام ماكان عبدالحليم عايش ,وبورثو لاخو بدلة السفاري الي كان يروح يزبط فيها بنات او بنطلون الشرلستون تبعو وبيجي اخونا الفايع المخنوق بلبس هاالبدي وبحطو جوا البنطلون الشارلستون او القماش اكتر من هيك لأ الجيينز ملغي من حياتو وبرفع البنطلون لحلقو عشان ما يسحل وبحط حزام و بيتكندر (بيعد عنكو) واهم شي المكون السحري المستعمل بين كل انواع الشباب ((الجل))
بس تختلف التمشيطة من شب لشب.... بيجي الاخ بحط جل وبيفرق شعرو من النص او بلبدو على جنب حسب الطلعة وبوخد سيارة ابوه المرسيدس القديمة تتذكروها اكيد مرت على كل بيت وبحط الشب الرومانسي هاني شاكر علي الدحكاية علي.(.كان عمري 7 سنين لما طلعت هالاغنية)... وبصير وضعو زنون وبروح الله يحرسو الى هدفو السامي يزبط طبعا البنت بتشوف هالمنظر يا بتغمى من الضحك يا بتصير تدعيلو اللهم عافيهم ولا تبتلينا حسب طبعا اكيد راح يلاقيلو فايعة مخنوقة زيو او خاروفة مش شايفة خير بس راح يتعب شوي بس انا من ناحيتي بس شب متل هيك يصير يغمزلي بعيوني بفكر عينو بتوجعو .. ايش يا حبيبي ليكون مفكرني شادية ولا نادية لطفي لايمكن هند رستم وجع... روح دور على شادية تبعتك بشي حديقة عامة او منتزة او عالبحر قال جاي يزبط بنات بهيك منظر بالمول...
2: الفايع الكوول
الفايع الكول: او ممكن الطنط الحارس الشخصي لاختو هون بكون اخونا لابس بلوزة تبعت عمتو الناصحة ام ابراهيم بكون مقاسها اكس اكس اكس اكس لارج وبنطلون اخوه الكبير اشتراه وبكون صغير عليه فمعطي اياه مش كرم اخلاق بس المحل ما رضي يبدلو فبحمل عيلة اخوه جميلة وبعطي اياه طبعا بكون المقاس اكبر من مقاس الاخو بنمرتين فبصير يسحول عليه بس الي بفلق انو الشب الكول بس يسحل بنطلونو بنشوف عجيبة من عجايب الدنيا زي البترا المدينة الوردية بلا تشبيه يعني الي لابسو زهري والي لا بسو مخطط والي عليه ماركات والي لابسو ملون والي عليه تويتي وسلاحف النينجا....... صغرة ريتها انشالله شو موضة بنطلون ساحل وتحتيه قلاعيط اي قرف الي يقرفكو على هيك موديل الواحد ازا شاف هيك مناظر عالصبح بتصير منافسو تلعي وبحس حالو بدو.. ولا بلاش جد الله يعين الحوامل على هيك مناظر وما بننسى المكون السحري الجل كل العلبة طبعا اشي مفروغ منو (ملاحظة لما يكون الشب حاط كاب او طاقية اعرفو انو يا ما لحق يحط جل يا اما علبة الجل خالصة بس بدون جل مستحيل يفرجيكو شعرو وبيحكو عنا احنا البنات انو ما فينا نمشي بلا ما نحط علبة بودرة على وجهنا ) وهون يا بوقفو سبايكي زي الي حاط ايدو بالغلط على سلك كهربا مكشوف يابكون طويل وبلبدو وبربطو بوني تيل وبحط فيونكة اوبعملو كيرلي لا اصلا هو بكون كيرلي وبعملو نيجرو وممكن يكون مخلي شغالتهم الاثيوبية تعملو شعرو جدايل وازا ما عندهم شغالة ممكن شغالة جيرانهم.. متل اخوي كانو صحابو يوم الخميس يتجمعو صف عند الباب قبل الطلعة وشغالتنا جيجي (طوشة والشباب بفزعو فيها) نازلة تجديل لها الشباب الي شعرو ناعم والي شعرو مجرجر كلو بجدل وانا بقعد اضحك وادعي الله يشفيهم بعدين بطلع صاحبنا الكول واخيرا وبركب سيارة كشف او رنج تبعت صاحبو وبصير يعرط فيها قدام البنات بلفلف وبحط اغاني اجنبي انو قال يعني الاخ مطزوع بشيكاغو ما علينا ..
بالنسبة لبعض الشباب الهوس تبعهم بالبنات يتعدي الواقع يعني بس يسمع صوت بنت على التلفون بصير صوتها يلعب طميمة براسو او بس يعمل شات مع بنت بصير وخلص بدو اياها وبصير يحلم فيها وبتصير حبيبتو الي عالنت طب افرض طلع شكلها عو او طلعت ابو رجل مسلوخة اسفة ام رجل مسلوخة و ام ساطور شو بدو يكون موقفك وانت تارك البنت الي بتعرفها عشان حبيبتك الي عالنت طب كيف عرفت انها حلوة بحكيلك صوتها بخنق بدل انها حلوة اواحساسي بحكيلي هيك لاااا مركب رادار على احساسك ولا احساسك قمر صناعي ولا يمكن بفتح بالمندل فطلعت حلوة فبحكيلك حلوة باشر وحب فيها واحلق لكل البنات... بييجو الشباب بحكولك شو ما احنا مقاطيع مش شايفين خير ولا شايفين بنات اه عند موضوع البنات مقاطيع ..لا ولا الشباب الي بكونو صحاب عالعظم و لما يشوفو بنت اجنبية شقرا برخصو ويا حبيبي علي بصير ..كل واحد بنادي الفزعة تبعتو وشوي راح يفتحو شوارع بوجوه بعض عشانها كإنو البنات العرب كخة اي إحنا بنات العرب وضعنا زنون وجمالنا مش عند حدا بس شو بدك تحكي الشب العربي بضل شب عربي
3: الفايع الحفرتلي
الشب الفايع الحفرتلي: او الشب العتعيت.. وبكون لابس بلوزة اخنوقني صيف شتا عادي وفوقها قميص مسكرة زرارو وجينز مرفوع لفوق خصرو بشوي ولتحت صدرو بشوي وحاطلو حزام ابو حديدة على شكل صقر وكندرة ام بوز او تكسس شو بعرفني المهم ام بوز وبحط المكون السحري ( يعني ياما شايفين علبة جل ماشية بالشارع الها ايدين ورجلين و بتدخن كمان ويي بتطلع شب بني ادم ماشي طبيعي بس حاط علبة الجل كلها على شعرو ولا بس احنا علبة بودرة حاطة بنت) وبعمل شعرو من قدام طالع ومن وراى نازل ويلا عطيني على طواحيني فيعني لافيعك والوضع حريقة وبركب سيارتو البي ام القديمة او الزعرة وبحط ابو وديع
وبروح يتدمر ويربي قلق على باب المول ويدمر ويقلق البنات معو الله يقطعك هي ناقصة دماروقلق ونكد ماهي مدمرة وجاهزة روح ربي قلق با لحدائق ولا على طريق المطار.. المهم وخدلك على لفلفة وسقاعة دم.. اهه وبكون يدخن ويحرق يا فويسروي يا ال ام احمر يا اما بكون خرمان ومش ملاقي من الطفر وبصير يهسهس ويهلس وهو يزبط في البنات وبعمل فيها الشب المتحطم الي مكرز الي كان وفي ومخلص بس حصتو(صاحبتو) خانتو بشرفك طب انطز.. شو يا ليكون احنا مساطيل أو طربشات ولا صافيين الفيل بالباركينغ(يعني هنود) وانت بتتخوث قاعد وانو حبيتها وماعرفتش غيرها بس بلاااش و هي كعادة البنات طلعت قليلة اصل ورخيصة وتركتك يا حرام ..عنجد مساكين نحنا البنات كل شي غلط بنحط فينا مش الشباب همي بس يعرفو بنت حلوة بموتو عليها وبس تيجي مرة مع صحبيتها وتكون احلى منها بشوي برخصو و بتركوها وبموتو على صحبتها المهم انا دخلت المواضيع ببعض بس كل ما اتذكر اشي بفقع عن الشباب بدي اكتبو
4: الشباب الدواوين
الشباب الدواوين : او الشباب المقلعيين والشب الدونجي يعرف من شطبة الموس بوجهو على حد مطرياتي بهاي المنظمة هيك بينعرفو وبكون داق وشم وحالتو حالة و ممكن يكون رئيس عصابة بس مش لدرجة انو يكون زعيم المافيا وعضلات منفوخة زيادة عن اللزوم والذي منوو بكون وضعو متدعدر وللمبالغة بالموضوع بحكولك هاظ داقق عاسنانو انو من كثر ما هو الشب الي عامل ميمعة وكركبة او بكونو ناس عاطليين عن العمل ولما بيحكو كل التكاسي الي بتكون مارة بتوقف من كتر استعمال اليدين للتشبير.. بلا قافية وبكون عندهم مصطلحات مثل احنا هون والباقي كرتون او اشي فاخر عالاخر او اشي مرتب عالمكتب بس الي بضحك بالموضوع متل ما صار معي انو يجيلك شب رفيييييع وشكلو زي الشبح الي مضيع شبشبو ولا حفايتو ولابد وبكون دورو با لحياة مش اكتر من هواية او كونديشن حتى ولو سطيتو كف بيوقع وبصير بتفعفل وشعرو كاريه حاط عليه جل ومن كتر ماحاط عليه جل طالع كإنو مزيت ومش محمم شعرو من شهر وحالتو حالة ..
المهم صحبتي بالجامعة طلعت عليه لقب ابو شعر مزيت بس التهمة دايما بتنلزق برئيسة الشلة يعني انا (بلا فخر) فبيجي الشبح ابو شعر مزيت بهدد فيي فشو بحكيلي انا شبح ايه..انا شب ديونجي كيف بتحكولي انا ابو شعر مزيت( وشوي راح يعيط من القهر) انا من المافيا الشرطة بتدور علي من سنة التسعين ومش ملاقيتني انا بفرجيكو..لاااا وانا بحكي عشان هيك البلد وضعها متكركب من سنة التسعين طب ذكرني ابلغ عنك عشان يستقر وضع البلد والاخ زعلان ومكسور خاطره لانو حكيناعنو ابو شعر مزيت قال دونجي قال قولو عاهة قولو مسطل قولو طربش ..هبيلة بس ديونجي عنجد الشباب عليهم قصص ما يعلم بيها الا ربنا حكتلكم الموضوع راح يشرق ويغرب ما رديتو بس راح اضل احكي عن الاشيا ء الي بتقهرني بالشباب لانو في كتير اشيا بتخنق فيهم ولا بس خلص التكملة عندكم يا بنات كل وحدة تكتب الشي الي بفقعها وبقهرها بالشباب اما بالنسبة للشباب طبعا انتو بتكملوونا واحنا ما بنستغني عنكم وانتو ما بستغنو عنا اكيييد بس معلش فشيت خلقي شوي بس بالمناسبة انا بحب مصطلحات الدواوين ولما كنت بالجامعة دفعت مصاري مرة لشب عشان يعلمني احط شفرة بتمي وشوية من حكي الدواوين بس كان راح يروح خدي نصين واصير معوقة ما علينا المهم انا بعرف كم مصطلح يمكن صارو قدام بس يعني اذافيه مصطلحات جديدة ياريت تعرفونا فيها عشان اكمل معجم الدواوين تبعي بما انو تخصصي لغات وترجمة لانو بنظري فيها فن واختراع لغة ومصطلحات الدونجية ولحالها عالم تاني............................ ولا لأ على كلن البقية تأتي
الخميس أكتوبر 31, 2024 3:22 am من طرف 
