من أشعار فهد المساعد

اشعار فهد بن مساعد , قصائد فهد المساعد


صعب لامنك فشلت وصعب لامنك لقيت
ان من يكره نجاحك يدري انك مانجحت
أمس ضقت ورحت أقلب ذكرياتي وانتهيت
عندصورة طفل صوته مثل صوتي لاانجرحت
وش مثل لاوالله الاهذا أنا يوم ابتديت
أنطق حروف تلعثم في لساني لاانمدحت
هذا أنايوم الحياة بنظرتي عشرين بيت
ومسجدين ومدرسه من طين كم فيها اصطبحت
هذا أنا وأصبحت أتمتم هذا أنا حتى بغيت
أختنق بس القدر عيا على موتي وطحت
وصاح صوت الطفل فيني انت من وين ارتميت
قلت أنا المستقبل اللي فيه كم همت وطمحت
أمس كنت أبيك تكبر بس والله لودريت
اني اللي عشت لجله مت عندك واسترحت
لودريت ان الزمان يجر رجلي ماعديت
ولودريت ان البحوربلامواني ماسبحت
كان دربك لي طويل وكل ماشفتك هويت
قلت لك كبوة جوادوماكبيت الا وجمحت
ليه تسمعني وتمشي؟؟..آآآآآه ليتك مامشيت
وآه ليتك من كثرعثرات الأيام انتصحت
ضاعت أحلامي وظل الحزن فيني واهتديت
للطريق اللي يوديني على دمعي ورحت
يالحزن ليتك مثل دمعي وتنزل لارقيت
بس أعرفك لو مسحت الدمع تبقى ماانمسحت
كان حلمي في وجود انسان يبكي لابكيت
وصارحلمي في وجودانسان يفرح لافرحت
كنت أشوف الناس مثلي كل ماجعت وضميت
مادريت ان الأوادم ناس فوق وناس تحت
آآآآه يااول ذكرياتي خذني بحضنك نسيت
لسألك عن وجه أبوي اللي معه ياماسرحت
وخذني بحضنك أبغفى ياااه مبطي ماغفيت
وان لمحت دموع عيني سونفسك مالمحت
خذني بحضنك وبعثر في جروحي وان قضيت
هزلي كتفي وقل لي(عيب تبكي لو سمحت)
اضحك وعلم زماني من أنامن وين جيت
طق باب الحزن واصرخ في لامني فتحت
وضمني يمك وكمل ضحكتك لامن بكيت
ودي أذكركيف كانت ضحكتي لامن فرحت..

/
من عز نومي صحيت وشفت في عينـي
دمع تهادى علـى جفنـي وأنـا غافـي
ستـرت دمعـي بكمـي قبـل يغرينـي
وأخذت هذا الجسد مـن باقـي لحافـي
وسريـت تايـه ورا خطـوات رجلينـي
لا الوجه وجهي ولا أوصافي هي أوصافي
أمشـي وأقـول لطريقـي لا توديـنـي
لعيون ناس تبي تـدري عـن الخافـي
أمانتـك .. خلهـا مـا بينـك وبيـنـي
خابرك يالـدرب خـوة عمـر وسنافـي
مـا ودي النـاس تـدري وش يبكينـي
كرامة النفـس ورث أبـوي وأسلافـي
أمشي وأحس الخناجـر فـي شرايينـي
والبرد يمشي وراي وينهـش اطرافـي
وحيـد واللـيـل بـردونـه يغطيـنـي
تقـول كـن البلـد روح بهـا السافـي
إلين ما أوحيـت لـي صـوت ينادينـي
صوت أعرفه مثل ما أجهل وش خلافـي
قمـت أتلفـت وانــادي لا تخليـنـي
ما غيره .. الصوت هذا صوتـه الدافـي
ولمحت زولك من أقصى الدرب لافينـي
مدري وش اقول لكن حـي هـا اللافـي
تعال.. شف غيبتك كيـف أثـرت فينـي
تعال.. شفني وأنا أغرق عقب مجدافـي
تعال.. خذنـي ورحبـي مـن عناوينـي
تعبت أعدي على جمـرك وأنـا حافـي
تعال.. واقطف بصوتـك زهـرة سنينـي
كـل المواعيـد عقبـك شمعهـا طافـي
تعـال.. وازرع خصـل شعـرك بكفينـي
بضمهـا ليـن أحـس بليلـك الظافـي
تعال.. وشفيـك خايـف؟ أنـت ناسينـي؟
قطعت صوتـي عليـك وطـال ميقافـي
حتى بديت أشعـر أن الحـب معمينـي
وان أنت حلم عثى فينـي وأنـا غافـي
لكن أمانـة تـرى اللـي فـي كافينـي
إن رحت منك كذا مـا رحـت متعافـي
بصـدق الحلـم وأحـذر لا تصحيـنـي
في خاطـري كلمتيـن إن قلتهـا كافـي
أمانة الله عليك إن غبـت عـن عينـي
لا يكون قلبك مثل قلـب الزمـن جافـي
مع كـل دمعـة تذكـر رعشـة يدينـي
ومع كل ضحكـة تذكـر قلبـي الوافـي

/
يوم هبّ الوقت وأعماني عجاجه

الفرج عيّا .. وأنا بالصبر راهي

ويوم مال وطال ميله وأعوجاجه

رحت أدوّر شي ٍ يشد إنتباهي

وشفت زولك مقبل ٍ مثل إنفراجه

كنّه اللي جايبٍ عزّي و جاهي

ياه ياضيقات صدري وإبتهاجه

تذكر آخر مرة ٍ شفتك ..متى هي !!

صاحبك من يومها زاد إحتياجه

وأمتطى ظهر المصايب والدواهي

سولف الليله على قلبي و ناجه

من بقى لي غيرك أفخر به وأباهي

يابعد من كدّر غيابي مزاجه

ويابعد من مرّت حروفه شفاهي

رغم حيرة قلبك ورغم إنزعاجه

الزمن .. ماغيّر احساسه تجاهي

ورغم وحشة بعدك وقسوة سياجه

كل حاجه فيك ظلّت مثل ماهي

الخجل في وجهك أول مـ نتواجه

والبراءه في عيونك وأنت ساهي

وبسمتك لامن بغيت تقول حاجه

وغيرتك لاشفت كنّي عنك لاهي

قبل أشوفك .. والزمن عاقد حجاجه

أسأله : وش فيك ؟! وألقى العذر واهي

ويوم شفتك قلت للوقت وعجاجه :

هيه ياللي في طعونك كنت راهي

أنت لو غيّرت فينا ألف حاجه

القلوب البيض تبقى مثل ماهي

/



صوّت حبيبي وقبل أقول ياعونك


شكا جروحه ورحت اشكي له اطعوني


يقول ما اقدر أعيش اليوم من دونك


واقول حتى ولو ماعشت من دوني


يمكن أنا أكون اعز إنسان فعيونك


بس انت والله كل الناس فعيوني


لاصرت ربعي .. وداري فيّة اجفونك


وش دخّل الناس خل الناس يجفوني


يكفيني إن انت لامن قلت وشلونك


تطيب كل الجروح ويختلف لوني


وان كان منت بمصدقني على هونك


تعال طالع ادروبك وين ودوني


اصبحت اجامل اعداي اللي يحبونك


واكره مشاهد اعداك اللي يحبوني


ومن كثر ما أحب واكره عنك واصونك


اصبحت دفتر مشاعر وأنت مضموني


إن غبت عني شعرت بلذة طعونك


وان شفت زولك شعرت بقيمة عيوني




/

ياقلب طالـت قسوتـك وأنـت ليّـن
في قسوتك ياقلب ويش انت لاقي !؟
اللي تعـدّى عمـر ماهـوب هيّـن
والعالم الله كم مـن العمـر باقـي !
يمكن يطول .. ويمكن اليـوم أعيّـن
موتي .. ويبكون الحبايـب فراقـي
وش عاد أسوي وسط قبري وأزيّن ؟!
لاجفت عروق .. وعيون .. وسواقي
لا عاد بـه فرصـة عشـان آتحيّـن
ولا عاد به زفـرة وأفـك اختناقـي
باكـر وكـل اللـي سترتـه يبيّـن
وانا علـى هالحـال ميّـس وهاقـي
مـدري متـى يهدينـي الله وأديّـن
وأكف عن بعض المشاوير ساقـي !