يمه الحنونه

الى امنا فلسطين
الى امهاتنا في وطننا العربي
الى روح امي
اهدي قصيدتي
^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^
يمه
محلى قعدة الصبح
اصحى افرفك العيون
واسمعك بتدعيلي
بلسانك الحنون
يمه
محلى خبز الفجرية
يلي بعرقك معجون
يا محلى خبزك المقمر
نما يطنع من الطابون
وبايدك تتطعميني
الزيت والزعتر والزيتون
يمه
نما اطلع على المدرسة
ما بترضيني
الا مهندم ومزيون
وعلى السنسلة واقفة
بتدعيلي ربي يحميني ويصون
ويمه
توصيني ادير بالي على الدرس
حتى الصعب علي يهون
ما في عنا حدى متعلم
ومستقبلنا يمه بايدك مرهون
ويمه
ونما اروح من المدرسة
امشوب وموهون
ما احلى شربة اللبن
من ايدك بظل الزيزفون
لبن مروب في بوشة الفخار
مش بزبادي قزاز وصحون
شربة بتنسيني تعبي
قد ما يكون
يمه
محلى طبخة العصيدة من ايدك
وبحدها كم عصفور مشوي بالطابون
بتشفي كل مريض
وكل موجوع وموهون
يمه
يا محلى الثوب المطرز
مطرز بايدك بليل السكون
على حساب
راحة الجسد والعيون
تيطنع لوحة فنية
بتعجز عنها الفنون
يمه
هاللوحة ثوبك الفلسطيني
وربنا لايدك يسلم ويصون
اللي بعروقه وغرزه
اختزلتي هم الوطن المحزون
يمه
من الفجر على السهل
تفلعي الزرع وتلقطي الزيتون
ولابويه قي الحقل ايد بايد
دايما بتقدمي العون
ونما بترجعي المسا ما بتظهري تعبك
وبقلبك الكبير بتخليه مدفون
يمه
وبعد التعب نلتم حدك
قرب قلبك الحنون
بتدفينا على نار الكانون
وعن جدودنا تخبرينا
عن حبهم للا رض
وزيهم لازم نكون
وتخبرينا عن المجاهدين والثوار
و محاربتهم لليهودي الملعون
يمه
انت فلسطين
يمه
انت اجمل وجه
صابح هالكون
يمه
انت لولا شوفتك باحلف يمين
ابد ما لزمتنا العيون
يمه
نو طلبتي الروح مني
ما بتردد
والك كل المون
والك كل غالي يرخص ويهون
يمه
الله يرحمك بترابك
مهما فدمنا الك
ما بنوفي الك هالديون
سامحينا
وقلبي على فراقك
مدمي ومحزون
ودمعي على بعدك
شلال نازل من العيون
********************************* مازن الطريفي 21/3/2011

الله عليك اخ مازن
كلمات لها مشاعر جميله جدا ومميزة صح لسانك
وعطرت المنتدى بابداعتك ماننحرم لك منى كل تقدير واحترام

يمه
انت لولا شوفتك باحلف يمين
ابد ما لزمتنا العيون
يمه
نو طلبتي الروح مني
ما بتردد
والك كل المون
والك كل غالي يرخص ويهون
يمه
الله يرحمك بترابك
مهما فدمنا الك
ما بنوفي الك هالديون
سامحينا
وقلبي على فراقك
مدمي ومحزون
ودمعي على بعدك
شلال نازل من العيون



روعه روعه روعه روعه

اول شي ..الله يرحم الحجة ..ويسكنها فسيح جناته يارب

فعلا" ...اعجبتني ..ريحة الخبز منها فاحت .... والوان الثوب المطرز بتلالي ... والسلسلة الممدودة عطراف البيت ...بتشهد عأحلى بلد..

الف شكر الك ابو محمد ..والللللللللللللللله ابدعت....

بتستاهل كل التقدير.....................+

كل الشكر المعطر بالود لاخواتي
بريق وقوت لمرورهما والرد على قصيدتي
وكل الشكر الخالص لمن تصفح صفحتي وقرأ محتواها .

رح الله امك واسكنها فسيح جنانه اخي الطريفي

رحم الله اموات المسلمين جمبعا وغفر الله لهم وادخلهم فسيح جنانه برحمته ورضوانه امين يا رب العالمين.

كل الشكر
اختي وجد واخي فارس الاحلام على المرور والمتابعة
والتشجيع المستمر.
الطريفي مازن