كونستانتين كافافيس

كونستانتين كافافيس




كونستانتين كافافيس





كونستانتين بيترو كافافيس أو قسطنطين كفافيس ، (باليونانى : Κωνσταντίνος Π. Καβάφης) (اسكندريه ، 29 ابريل 1863 – اسكندريه ، 29 ابريل 1933) كان صحفى و شاعر بيعتبروه من اعظم شعرا اليونان فى العصر الحديث. كافافيس اتولد و مات فى اسكندريه فى مصر و يوم ميلاده و وفاته زى بعض ( 29 ابريل )، و نشر اكتر من 154 قصيده.اترجمت اعماله لسبعين لغه.
بدأ كفافيس كتابة الشعر و هو عنده 19 سنة و نشر أول مجموعة مطبوعه من
أشعاره لما بقى عنده 41 سنه ، نشر اول مجموعه سنة 1904 و كانت بتتكون من
اربعتاشر قصيده ، و فى سنة 1910 نشر مجموعته التانيه و كانت عباره عن
الاربعتاشر قصيده بتاعة المجموعه الاولى و عليها اتناشر قصيده جديده ، و
نشرت له مجلة " الحياة الجديدة " قصايد من سنة 1908 لسنة 1918 و مع مرور
الوقت اتجاوزت شهرته اسكندريه و وصلت للأفاق العالميه.

كونستانتين كافافيس كان حفيد تاجر الماظ يونانى و ابوه كان راجل اعمال و
امه من الطبقه الارستقراطيه. و كان الابن التاسع بعد بنت اسمها " هيلينى "
ماتت و هى صغيره ، و لانها كانت البنت الوحيده حاولت امه تعوضها بمعاملة
كفافيس كبنت فكانت بتدلعه قوى و تلبسه هدوم بنات و تسرح له شعره و
تضفرهوله و كان على طول معاها و فيه بيقولو ان ده السبب فى انه طلع خجول و
منطوى و ما بيعتمدش على نفسه. أخد كافافيس دبلوم تجاره و اشتغل سمسار و
موظف. و بعد ما اتوفت امه اللى كان بيحبها قوى سنة 1899 اتوفى اكبر اخواته
جورج ( 1900 ) و أخواته اريستيديس ( 1902 ) و الكسندر اللى كان احب اخواته
ليه ( 1903 ) و جون ( 1923 ) و بول ( 1920 ). و فى سنة 1923 اتصاب كفافيس
بمرض سرطان الحنجره و عمل عمليه و ضاعت منه القدره ع الكلام و قضى أخر
ايامه فى المستشفى اليونانى فى اسكندريه.
متحفه


اتحول بيت كافافيس الموجود فى الدور التالت فى عماره قديمه ورا مسرح سيد درويش
فى محطة الرمل لمتحف. قبل ما يتحول لمتحف كانو عملوه بنسيون اسمه " بنسيون
أمير " لكن القنصليه اليونانيه فى اسكندريه اشترته و حولته لمتحف سنة
1991. اتحط فى المتحف قناع الدفن بتاع كافافيس و موبيليا و هدايا من
الكنيسه اليونانيه و مؤلفاته و شرايط عليها قصايده متلحنه و نصوص مكتوبه
بخط ايده و ايقونات و مجلد ضخم اسمه " دليل اسكندريه " فيه صور قديمه
نادره و فيه على الحيطه لوحه زيتيه للخديوى اسماعيل
اللى كان صاحب أبو كفافيس ، و اتحطت يافطه رخام اسود عند مدخل العماره
مكتوب عليها " فى البيت ده عاش كفافيس أخر خمسه و عشرين سنه من حياته " .
رئيس اليونان الحالى زار متحف كفافيس.