قصــيدة الأم
* * * * *
قصيدتي زاد بعيوني جمالها *** واخذت أنقي بالمعاني جزالها
واكتب معانيها من الشوق والغلا *** لأمي وأنا اصغر شاعر ٍمن عيالها
كتبتها في غربتي يوم رحلتي *** لما طرالي بالسفر ماطرالها
امي وانا بوصف لها زود حبها *** وان ماحكيت لها قصيدي حكالها
امي لها بالجوف و القلب منزله *** مكانة ماكل محبوب نالهــا
اقرب من ظلالي وانا وسط غربتي *** وانا تراي اقرب لها من ظلالها
ماشافت اعيوني من الناس غيرها *** ولا خلق رب الخلايق مثالها
اغلا بشر في جملة الناس كلهم *** واكرم من ايدين المزون وهمالها
اتبع رضاها ورتجي زود قربها *** واللي طلبته من حياتي وصالها
الصدق مرساها والاشواق بحرها *** والعطف واحساس الغلا راس مالها
اهيم فيها وابتسم يوم قلبها *** يسأل وانا قلبي يجاوب سؤالها
وان اطلبتني شي فزيت مندفع *** اموت أنا واحمل تعبها بدالها
اصبر على الدنيا والاحزان والتعب *** واحمل على متني فطاحل جبالها
واسهر اعذب راحة القلب بالشقا *** واعيش اعاني بس يرتاح بالها
تربية ابوي اللي على الطيب بذكرة *** اللي وهبني للحياه ومجالها
نور لي ادروبي وانا طفل مبتدي *** حتى تركني واحد من رجالها
الوالدين اولى بالاحسان لجلهم *** وأولى بتكريم النفوس وعدالها
اقولها وانا على الله متكل *** والله عليم بقدرتي واحتمالها
ياكلمة اغلى من الناس كلهم *** ياشمس بقلبي بعيد زوالهاا
يافرحة تملي لي الكون باكمله *** ياشجرة تكبر ويكبر ظلالها
تضحك لي الدنيا ليا شفت زولها *** مثل السما تزها بطلة هلالها
والبعد عنها ياهل العرف ماقدره *** لاشك ناري زايدة باشتعالها
ماعيش ببلاد ولاهي بأرضاها *** ولابي عيوني كان ماهي قبالها
أرض ٍ تدوس امي بالاقدام رملها *** اموت فيها واندفن في رمالها
للشــاعر : حـامد زيـد
الخميس أكتوبر 31, 2024 3:22 am من طرف 
