قصة جبينه كما روتها أمي

أحبائي أعزائي الأعضاء ولكل من هو مهتم بالفلكلور الفلسطيني

من أشهر القصص الفلسطينيه قصة جبينه

وطبعا هيه قصه خرافيه وتعود روايتها الى الكنعانيين

وقد قمت بسماع القصه من أكثر من جهة وقررت بأن أكتبها كما روتها أمي الله يطولي بعمرها يا رب

بسم الله نبدأ

كان في أحدى القرى الفلسطينيه رجل امرأه عايشين لحالهم والله ما رزقهم بخلفه وفي يوم من الايام نزلت المره

على السوق وشافت الجبان بعمل بقرص هالجبن المدور الأبيض قالت (( يارب أرزقني في بنت تكون بيضه

بيضه مثل قرص هالجبنه ونذر علي غير اسميها جبينه )) وسمعة دعوتها الي ما بغفل ولا بنام وحبلت وجابن

بنت مثل قرص الجبنه وسمتها جبينه

ومن كثر ما جبينه حلوه صارت شهرتها في كل القرى وكان واحد من القريه بدو يتزوج وحده من قريه ثانيه

ووصا أبوه أنه جبينه تكون معهم بالعرس عشان شهرتها ويتباهو نسوان القريه بجمالها ،، وفعلا راح أبو الولد

لام جبينه وقالها (( يا أم جبينه وحياة جبينه تخلي جبينه تروح معنا الفارده )) بس أمها ما منت وقالت شوفو

أبوها وراحو لأبها وقالولو (( يا أبو جبينه وحياة جبينه تخلي جبينه تروح معنا الفارده )) وطبعا أبوها ما

مان على هالطلب كونها وحيدتهم وقاللهم روحو شوفو سيدها وطلبوا منه نفس الطلب وقلهم ما بمون شوفو ستها

وراح أبو العريس على ستها وقالها يا ست جبينه وحياة جبينه تخلي جبينه تروح معنا الفارد )) وقالت شو

عليه خليها تروح تشم هوا ....... وفعلا راحت جبينه بعد ما جهزها أبوها أمها وحطو بايدها خاتم شبيك لبيك

عشان اذا بصير معها اشي بس تحكي مع الختام وبسمعوها أهلها

وكفتوها ومشت الفارده بعد ما حطوها على هالفرس والعبده الزنتيته كانت تقود فيها ،،،، طبعا من جمال جبينه

كانو كل بنات القريه يكرهوها لأنه جمالها كان وصفه ،،، يعني حلوه كثير كثير وكانوا كل الشباب يتمنوا

يتزوجها ........... وهم في الطريق وقفتها العبده الزنتيته وقالتلها أنزلي والله لألبس لبستك وأركب ركبتك

خافت جبينه منها وصارت تصيح وتحكي مع الخاتم (( هيه يما ،،، العبده الزنتيته بدها تلبس لبستي وتركب

ركبتي )) سمعتها أمها ع طول من الختام وصاحت في العبده (( هيه يا عبده هيه ،، والله اذا ما طرتي عن

جبينه لأجي وأمصع رقبتك وخافت العبده وكملوا مشوارهم ولحقوا الفارده وعطشت جبينه وقالت هيه يا عبده بدي

أشرب وميلت على النهر وهيه بتغسل في ايديها وقع الخاتم وشافتها العبده وقالت اجا دوري هسا ،،، يالله يا

جبينه تعالي ألبس لبستك واركب ركبتك وفعلا لبست أواعيها وركبت على الفرس بعد ما طرشت حالها بالشيد

وصارت بيضه عشان الناس يفكروا انها جبينه واجت وصخمت جبينه بالفحم تصارت سوده سوده ،،، وقالتلها يالله

سوقي فيي يا عبده ،،،،، وأنكسر خاطرها جبينه مفش حدا يفزعلها ومشت مع الفارده توصلو العرس وكان

الامير يستى الفارده حتى يشوف جبينه ويتزوجها من كثر حلاتها

وفعلا أول ما شاف هالبياض راح متزوجها وقات الأفراح وجبينه مسكينه صارت عبده في دار الأمير ترعى

الغنمات والسخول ومش قادره تحكي خوف من العبده تذبحها

وصارت جبينه مع الخدم وتطلع كل يوم الصبح ترعى الغنم والسخول وترود وتقول

(( يا طيور طايره يا شمس سايره سلموا ع امي وأبوي وقولو جبينه راعيه ،، ترعى غنم ترعى سخول تقيل

بفي الزاوية )) وكانت جبينه كل يوم تروح تتحمم في النهر ويشوفوها البطات وتصيح بطه منهن كا كا كا والله

ما بتصلحي غير لأبن الأمير ،،،، وتخاف جبينه من العبده يوصلها هالحكي وتروح تذبح البطه وتشيها وتوكلها ،،

وكل يوم على هالحال لما تروح تتحمم في النهر وتصيح البطات وتحكي نفس الحكي وجبينه تذبحهم خوف ما

يوصل الحكي للعبده وتذبحها ................ حتى خلصوا البطات كلهم وانتبه ابن الامير وحكى لأمو والله

لأروح وأربط لهلعبده تشوف البطات وين رحن ؟؟؟؟؟؟؟؟؟؟

وفعلا ثاني يوم الصبح راح وربط عند النهر تيشوف جبينه شو بتعمل

ولما نزلت على النهر صاحت جاجه من هالجاجات وقالت كا كا كا والله ما بتصلحي غير لأبن الأمير وخافت يوصل

هالحكي للعبده وتذبحها راحت ذابحه الجاجه وما كلتها

وابن الامير شايف كل اشي وروح على البيت المغربيات وقال لأمو لما تيجي العبده خليها تلطعلي العشا

استغربت أمه وقالتلو (( العبده )) يع يع يما ليش العبده خلص بطلعلك العشا مع الخدم المنيحين الي عنا ،،

زعل الولد من أمه وقالها بدي ألعبده الزنتيته هيه الي تجيبلي العشا

قالتلو امه والضالين أمين مثل ما بدك يما

واجت جبينه من المرعى وحطت السخول والغنمات في الزريبه ولا أم الامير بتنادي عليها وبتقلها تعالي طلعي

العشا للأمير

؟؟؟؟؟؟؟؟؟؟؟؟؟؟؟؟؟؟؟؟؟

تعجبت جبينه وقالت لأمه أنا ما بقدر أطلعله العشا صاحت فيها أمه ولك يا غبصه هو الي بدو ،، يالله بسع بسع

وفعلا طلعت جبينه بالعشا وطبلت على الباب ولا هالامير حامل طشط مي وكبه عليها ولا هيه بيضه بيضه مثل

الجبنه

قالها تعالي وله شو قصتك ؟؟؟؟؟؟؟؟؟؟؟

فخرفت جبينه قصتها لأبن الأمير وشو عملت فيها العبده الزنتيته وقالها يعني أبو هسا متجوز العبده الزنتيته

قالتلو أه وقلها اذا بتكذبي قالتول أذبحني

وفعلا راح ابن الامير لأبوه وخرفه السولافه كله ولما اجت العبده الزنتيته على اسا انها جبينه كب عليها سطل ميه

ولا هيه عبده سوده قال أعوذ بالله من الشيطان الرجيم

ولك بتضحكي علي

وأمر أبنه الصبح يقول في الناس (( يا ناس الي بحب السلطان يجيب حضن حطب ويجمعوا بالساحه )) وصارو

الناس الي بحب السلطان ولي بنافقه يحملوا بهالحطبات ويجيبواها ومش عارفين شو السولافه

ولما اتجمعوا كل الناس

اجا الامير قال لأبنه خلي جبينه تحكي قصتها للناس

ولما طلعت جبينه انبهرت الناس وانبخعت من جمالها وبياضها

وصارت تسرد بهالقصه

ولما عرفوا مسكو العبده الزنتيته وحطوها وربطوها ورمو على هالحطبات وولعو فيها وانحرقت وراح شرها معها

وبهبك استأذن ابن الامير من أبوه انه يتزوج جبينه وودو ورا أهلها وتجوزها ابن الامير وقامت الافراح والليلالي

الملاح

وسلامتكم وسلمتم

انتهت القصه

ولي عوده للاستجابه على اي استفسار

قصة جبينه كما روتها أمي 30_12_1213568613711

وللعلم أحبائي بأن قصه جبينه لها أكثر من روايه

وهنا سأطرح عليكم هذا الفيلم الكرتوني

لجبينه ولكن بروايه أخرى