حصيصه في شارع التحليه

:الشخصيات:

"حصيصه"..بطلة السالفه..

"نويّر"..راعيه بر وقنص معها هايلكس 2005..

"سويّر"..عربجيه الحاره..

"هاي ناس"..محل تصوير ..



بطله هالسالفه هي الانسه حصيصه..طبعا حصيصه بعد ما نجحت وتخرجت من الثانويه طقت لها امها موتر يحبه قلبها من النوع البناتي وعلى طول طارت عجتها لمحل زينه السيارات... بتركب انواع الزينه بسيارتها من تظليله فوشي لجنوط موف ..وانصدمت بأن كل هالحاجت ما هي موجوده..
عقبها قررت حصيصه انها تسوي اللي ما يتسوى وانها تثبت رجولتها وتنسف شعرها وراها وتقلبها سامري في شوارع الرياض .. المهم مرت ربعها من بنات الحاره وركبتهن وراحت تدور في كل عاير وتشطف الليموزينات وكل لفه لازم تزّحف الموتر وخوياتها يتراقن في مرتبه ورا (( بطول بالعرض حصيصه تهز الارض ))...
وقتها دق جوال حصيصه والاهي خويتها نوّير راعية الددسن..تقول لها انها بتكشت بالثمامه ومعها العدّه كلها مركّبتن شنطه في الصندوق حقت البر وحاطه فيها مكياج وبودي كير واستشوار وحاطه دافور وردي وعلمتهم انها تحتريهم هناك..قد دقت الرواق وكلش..قالت حصيصه..مابدهاش يابنت يلزمنا نروح ..زهمت على العربجيه سويّر وقالت لها تخاويها...

وهم بطريق سقطت عليهم كامري تسوقها وحدة وشطفتهم وعطتهم غمزتين بالاشاره "يعني بدري عليكم"..وتجن حصيصه وتمعط شوشتها من القهر وتكتم لام الدعسه وخذ يا مساقط على الدائري وكل ما وصلو حول الكامري قامت سويّر وطلّعت راسها مع الدريشه وهي تدلع لسانها ومادروا الا وراعيه الكامري تحدهم على الرصيف لين اعترض الموتر بحصيصه وخلاها تزحف لين خشت في الكبري ..
(( وبعد ما جت الدوريه وحققوا بالحادث حطو الخطاء 99% على الكبري و1% على الفرامل ومدام الدعوى عوافي مع ان الحادث يخلي الواحد يقول ياكافي ))..
قررت حصيصه انها تاخذ حقها حتى لو طال الزمن المهم جا اجتماع بين حصيصه وسويّر ونويّر في احد الكوفي شوبات وبعد ما طلعوا ركبوا سيارة النوري الهايلكس الغمارتين وراحوا لشارع التحليه بغرض التمشي والاستهبال ومشغلين اغنيه "مايكل جاكسون.. مشكلني"..ومطولين عليها والافيه واحد من الشباب موقف عندهم شكله قاط معهم بالموتر ويقعد يطالع فيهم وحاط يده تحت ذقنه ويتلّص فيهم التفتت حصيصه على نويّر قالت لها وش يبي ذا هو وخشمه اللي تسنه نقانق عارمها تكروني..التفتت عليه سويّر العربجيه وقالت:هذي سياره ترا مهيب محل هاي ناس .. رد عليها الولد وقال:وش محل هاي ناس انا قاعد اطالع احلى ناس ..وما كمل كلامه الا وشريط "آه ونص حق برتني" ماخذن لفّه على خشته .. وتفتح الاشاره والايوم شافو قدامهم كامري مشكوك فيها ويوم قربوا منها فزت حصيصه من مكانها ويديها على الطبلون ..وآآآآآع هذي هي اللي حدتني لين طبع الروج حقي في سميت الكبري والله انها هي جعلها الماحي هي وقرونها نفس اللوحه وتدحج الطبلون..

وتبداء اللحظات المثيره ويبدا دم "جمس بوند" يمشي بعروقهم راحو وراها بدون ما تدري عشان ما تخاف وتنحاش ويوم وقفت عند محل مناسبات ونزلت والاهذولي ربعنا في وجهها طبعا هي ما عرفتهم ووقفوا قدام وجهها ..

حصيصه معاها "معصاد الجريش"..
وسويّر معاها "مغرفه الفول"
ونويّر معاها "ملقاط جمر"..

قالت لهم نعم وش تبون واقفين قدامي..غرض حاجه؟؟
ردو عليها بصوت واحد عندنا مناسبه سعيدة وبنحتفل في وجهك ..وتبدا الهوشه والطق والطقيق وتمعيط الشوش ونويّر من زود النذاله تمسك خشمها بالملقاط وتقبص عليه...


طبعا الشباب ما صدقو خبر اجتمعوا عشان يفكون النزاع ومنهم اللي لقط الغنايم اللي عباره عن..شباصات وبكلات وربطات بيحتفظون بها لذكرى..
وبعد دقايق جت اللومينا تسوقها الملازمه "جهيّر" منقطع حزام بنطلونها ..((مسكينه تداوم وهي حامل بالشهر الثامن ))..
وبعد التحقيقات واخذ الرخص ودتهم للحجز..
وهناك صار تنازلات وحوسه وطلعت حصيصه ومن معها بكفاله وتعهد انها ما تسبب مشاكل ولا تتحرش بباقي السيارات حتى لو اخطوا عليهم..




وبعد هذا كله .. لو ساقت البنت..

_ماعاد راح نشوف سيارات توصيل الطلبات((كل وحده تخلص لزومها بنفسها))

_ماعادفيه شي اسمه سواق ونوفر غرفته في البيت ونحطها مستودع تحط البنت فيه قراشيع سيارتها ..

_تتحول المشاغل النسائيه الى محلات زينه واكسسوار لسيارات ..وتخيلو سيارة تسوقها بنت ماسكه المساحات بشباصات..خخخخخ

_والشباب الحين رافضين الشغل في البنشر والورش ووقت ما تسوق البنت تشوفهم يتهاوشون على وظيفه بنشري سوبر شل او كهربائي سيارات حتى الجامعيين..

_والشباب بيزين حالهم كل واحد بتشوفه كاشخ اربع وعشرين ساعه..خخخخخخ